Hopp til innhold

Nígería

Nígería er eitt af þéttbýlustu löndum Afríku og eru íbúar landsins af mörgum ólíkum ættbálkum. Landið er ríkt af náttúruauðlindum en þjáist af margra ára stjórnmála- og efnahagslegri óstjórn.

Síðast uppfært 06.04.2015

Landafræði og náttúra

Suðurhluti landsins er láglendur með hitabeltisloftslagi og regnskógi, en norðurhluti landsins er hálendi. Vegna frjósamrar jarðar er Nígería hagstætt landbúnaðarland, auk þess sem mikið er af olíu- og gaslindum í landinu. Undanfarin ár hefur olíuvinnsla leitt til mikilla og alvarlegra umhverfisvandamála, sérstaklega í óshólmum árinnar Níger. Bæði vatn, loft og jörð eru menguð, Svæði sem áður voru notuð til landbúnaðar eru nú eyðilögð vegna olíuúrgangs. Hröð skógareyðing er einnig í Nígeríu.

Ecoprint

0.6 plánetunni Jörð

Ef allt mannkyn myndi neyta til jafns eins og gerist að meðaltali í Nígería, þá þyrftum við 0.6 eintök af plánetunni Jörð.
Sjá mælistikuna fyrir vistfræðileg áhrif.

Saga

Fyrir 10 þúsund árum bjó fólk á því svæði sem nú heitir Nígería. Hin svokallaða Nok-menning, frá um það bil 500 f.Kr. til 200 e.Kr., er elsta járnaldarsamfélagið sem upprunnið er frá Afríku sunnan Sahara. Áður en svæðið varð nýlenda Breta í upphafi tuttugustu aldar var því skipt á milli margra ólíkra konungdæma. Landið var nýlenda Breta fram að sjálfstæði þess árið 1960. Þremur árum síðar var lýst yfir lýðveldi í Nígeríu. Árið 1967 braust út borgarastríð í landinu þegar hérað í suðaustri, Biafra, lýsti yfir sjálfstæði. Borgarastríðið kostaði mörg hundruð þúsund manns lífið, flestir dóu úr hungri. Biafra tapaði stríðinu og er enn hluti af Nígeríu, en öfl í héraðinu berjast enn fyrir sjálfstæði. Herstjórnir réðu í Nígeríu til ársins 1999 en borgaralegt stjórnvald síðan.

Samfélag og stjórnmál

Nígería er sambandslýðveldi þar sem forsetinn fer með ríkisvald, stjórnvald og æðsta hervald. Þrátt fyrir eflingu lýðræðis í landinu frá árinu 1999, þegar hernaðarlegt einræði leið undir lok, telst Nígeria enn vera einræðisríki. Spilling einkennir stóran hluta samfélagsins. Miklar andstæður eru innan stjórnmála, þjóðerna og trúarbragða þeirra 250 mismunandi hópa fólks sem þar er að finna. Helsti ágreiningur er um stjórnun aðfanga og pólitísk áhrif.

Töluverð spenna milli æðsta stjórnvalds og hinna 36 ríkisstjóra einkennir Nígeríu. Svæðisbundin uppþot og mótmæli eru tíð. Stjórnvöld þurfa stundum að kalla til hermenn og lögreglu við að stöðva blóðug átök milli kristinna manna og múslíma í mismunandi landshlutum. Fleiri hundruð manns hafa fallið í slíkum átökum síðastliðin ár. Frá árinu 2009 hafa hryðjuverk íslömsku samtakanna Boko Haram stórlega ógnað öryggi íbúa í norðurhlutanum.

Skammvinnar herstjórnir hafa einkennt stjórn Nígeríu frá sjálfstæði landsins, auk stjórnmálalegs óstöðugleika, valdarána, morða á stjórnmálaleiðtogum og spillingar. Nígerísk stjórnvöld eru þekkt fyrir spillingu og fyrir að myrða stjórnarandstæðinga. Alþjóðasamfélagið fordæmdi til að mynda aftöku rithöfundarins Ken Saro-Wiwa og átta annarra mannréttindasinna árið 1995. Þeir gagnrýndu allir stjórnvöld, börðust gegn spillingu og fyrir umhverfisvænni úrvinnslu olíu. Þeir börðust einnig fyrir því að stærri hluti tekna af olíuiðnaði landsins skilaði sér inn í nígerískt samfélag. Í dag fer stærstur hluti hagnaðarins í vasa alþjóðlegra fyrirtækja.

Hagkerfi og viðskipti

Árið 1960 stóðu landbúnaðarvörur undir um það bil 80 prósentum af útflutningstekjum landsins. Miklar tekjur af útflutningi á olíu á áttunda og níunda áratugnum gerðu það að verkum að landbúnaður fékk á sama tíma minni pólitískan forgang og mikið dró úr bæði útflutningi og framleiðslu. Ásamt gífurlegri fólksfjölgun hefur þetta leitt til þess að Nígería hefur undanfarin ár neyðst til þess að flytja inn landbúnaðarvörur. 

Olíugeirinn er mikilvægur hluti af efnahagi landsins og hefur stækkað á síðustu árum. Olían gefur miklar ríkistekjur en engu að síður leiðir spilling, pólitískur óstöðugleiki og misskipting auðs til þess að meirihluti íbúanna býr við fátækt. Áberandi munur er á fjárhag hins fátæka, múslímska norðurhluta og hins betur setta kristna suðurhluta.  Efnahagsleg óánægja er sterkur hvati átakanna í landinu.

Flestir eru háðir hefðbundnum landbúnaði, smærri viðskiptum og fábrotnum iðnaði sér til lífsviðurværis. Bandaríkin, ESB og Kína eru í dag stærstu viðskiptaríki Nígeríu. Nýir útreikningar í apríl 2014 sýndu að hagkerfi landsins er það stærsta í Afríku.

UN role play:

SÞ-hlutverkaleikur

Árið 2014 bauð SÞ-sambandið skólum að þróa hlutverkaleik um átök í Öryggisráðinu. Í þáttunum sem fylgja eru upplýsingar um leikinn. Meira um SÞ-hlutverkaleikinn á heimasíðu SÞ.

Samband við önnur lönd Öryggisráðsins

Nígería er aðili að Öryggisráði Sameinuðu þjóðanna í tvö ár (frá 2014 út árið 2015).

Nígería er valdamikið ríki í Afríku. Vaxandi efnahagur landsins stuðlar að því að efla þróun álfunnar. Nígería er meðal annars meðlimur í Afríkusambandinu (ASB), ECOWAS (Efnahagsbandalagi Vestur-Afríku ríkja) og Breska samveldinu. Sem fyrrverandi bresk nýlenda á Nígería í nánu sambandi við Bretland. Unnið er að viðskiptum og fjárfestingum milli landanna og stór hópur Nígeríumanna hefur flutt þangað. Bresk stórfyrirtæki starfa í Nígeríu, sérstaklega í olíubransanum.

Bandaríkin eru mikilvægasti viðskiptaaðili Nígeríu og lykil diplómatísk tenging landsins. Bandaríkin hafa einnig reitt af hendi aðstoð sína til landsins. Nígería hefur veitt Bandaríkjunum dyggan stuðning í baráttunni gegn hryðjuverkum og í leitinni að al-Qaida auk þess að hafa veitt hernaðaraðstoð sína við andhryðjuverkastarfsemi.

Nígería verslar við nágrannalandið Tsjad og margt verkafólk frá Tsjad vinnur í Nígeríu. Ekki hefur alltaf verið náið og gott samband milli landanna en bæði löndin sýnt áhuga á nánu samstarfi, sem gæti stuðlað að stöðugleika á svæðinu.

Nígería og Kína hafa þróað með sér betri tengsl á undanförnum árum. Nígería er mikilvæg olíuauðlind fyrir Kína og hefur snúið sér til Kína í þörf sinni fyrir hjálp og stuðning við uppbyggingu eigin fjárhags. Kína studdi framboð Nígeríu til Öryggisráðsins.

 

Samband við Sýrland

Nígería rekur sendiráð í Sýrlandi og samkvæmt heimasíðu sendiráðsins er vonast til að samvinna landanna hafi jákvæð áhrif fyrir bæði löndin og að samvinnuþróun verði á ýmsum sviðum, svo sem á sviði menntunar, landbúnaðar og tækni.

Í Öryggisráðinu hefur Nígería stutt tilraunir þess til að fá samþykktar aðgerðir fyrir Sýrland. Þegar ályktun 2139 var samþykkt í febrúar 2014 tjáði Nígería að það væri stórt skref í átt að bættu ástandi meðal íbúa Sýrlands. Á sama tíma lýsti fulltrúi Nígeríu yfir vonbrigðum með að ekki hafi náðst samkomulag um eitt atriði ályktunarinnar sem varðar stopp á vopnasölu til Sýrlands.

 

Ábendingar

Í Öryggisráðinu hefur Nígería tjáð stuðning sinn við allar mögulegar friðsamlegar framkvæmdir sem ætlað er að draga úr þjáningum sýrlensku þjóðarinnar og sem leitt geti til friðsamlegra lausna. Mikilvægt er fyrir Nígeríu að vernda íbúa Sýrlands og að Öryggisráðið skuldbindi sig við að hjálpa almennum borgurum með skýrum hætti. Á þingi Öryggisráðsins verður Nígería að gæta margra diplómatískra tengsla sinna. Þess er vænst að Nígería styðji við umleitanir til að ná samkomulagi innan Öryggisráðsins og að Nígería fari þess á leit að Öryggisráðið verði sýnilegt og þýðingarmikið í ferlinu við að binda endi á stríðið. Nígería styður vopnaviðskiptabann

Samantekt

Nígería

Höfuðborg:

Abuja

Þjóðernishópar:

Hausa/fulani 29%, yoruba 21%, igbo 18%, ijaw 10%, kanuri 4%, ibibio 3.5%, tiv 2.5%

Tungumál:

Enska, hausa, yoruba, igbo, fulani

Trúarbrögð:

Múslímar 50%, kristnir 40%, hefðbundin trúarbrögð 10%

Population:

183 523 432

Government:

Sambandslýðveldi

BNI per citizen:

5 992 PPP$

Gervihnattamyndir

Nigeróseyrarnar

Tjadstöðuvatnið

Aðild/þátttaka

Other country profiles

Stríð og átök

Félag Sameinuðu þjóðanna á Íslandi © 2017